Аллоҳнинг Ўзига ҳамдлар бўлсин!
Ортларидан набий йўқ зотга солавотлар бўлсин!
Ислом Фиқҳи Академияси Маккаи Мукаррамада, Робитанинг биносида, 1415 ҳ.с. 20 – Шаъбон (1995 йил, 20 - январ)да бошланган ўн тўртинчи мажлисида музораба ширкатида мол эгасининг фойдаси маълум миқдор мол ила белгиланиши жоизми эканлиги ҳақидаги масалани кўриб чиқди.
Муноқаша ва фикр алмашувлардан кейин Ислом Фиқҳи Академияси бир овоздан қуйидаги қарорларни қабул қилди:
Музорабада мол эгасининг фойдаси маълум миқдор мол ила белгиланиши жоиз эмас. Чунки, бу музораба ҳақиқатига зиддир ва бунда муомала фойдага қарз беришга айланиб қолади. Гоҳида фойда мол эгасига белгиланган мол миқдоридан ортмай қолиши мумкин. Гоҳида музорабада зарар кўрилиши ҳам бўлади. Ёки фойда мол эгасига белгиланган миқдордан оз бўлади ва шерик ундан қарздор бўлиб қолади.
Музораба билан фойдага қарз бериш орасидаги асосий фарқ шуки, музораба ишчиси қўлидаги мол омонат ҳисобланади. У ҳаддидан ошмаса ва камчиликка йўл қўймаса, тўлаб бермайди. Фойда мол эгаси ва иш бажарувчи орасида келишилган нисбатда тақсимланади. Улардан ҳеч бирига маълум миқдор белгилаб қўйилмайди.
