Савол: Уй-жой олди-сотди ишларида сотувчи билан харидор ўртасини келиштирувчи, уйини сотувчига харидор топишда ёрдам берувчи ва уй олувчига уй топишда ёрдам берувчи хизматига яраша ҳақ олиши жоизми?  Улар гоҳида бир томондан, гоҳида эса иккала томондан ҳам ҳақ олишади.
Жавоб: Бу каби хизмат қилувчилар даллол деб аталадилар. Даллоллик мубоҳ касбдир.

عن البزّازية : اجارة السمسار و المنادي و الحمّامي و الصكّاك و ما لا يقدر الوقت و لا العمل تجوز لما كان للنّاس به حاجة و يطيب الأجر المأخوذ لو قدّر اجر المثل.

"Баззозиядан нақл қилинади: Симсор (даллол), эълон қилувчи, китобга туширувчи ва яна улар учун вақтнинг ва амалнинг қанчалиги тайин бўлмаган кишиларнинг ижараси, одамларнинг эҳтиёжи кўп тушгани туфайли жоиздир. Агар хизмат ҳаққи тайин қилинган бўлса, бу каби кишилар олган ҳақ ҳалолдир («Роддул мухтор»)

قال في التترخانية :في الدلّال و السمسار يجب اجر المثل.

Даллол ва симсор(даллол)га ажри мисл вожиб бўлади. 
Лекин даллолликнинг ҳам ўз қонун-қоидалари бор.

امّا الدلّال فان باع العين بنفسه بإذن ربّه فأجرته علي البائع و ان سعي بينهما و باع المالك بنفسه يعتبر العرف.

Агар даллол сотувчининг нарсасини ўзи сотиб берса, ужра, яъни хизмат ҳаққи сотувчининг зиммасига бўлади. Агар даллол сотувчи ва олувчининг ўртасида ҳаракат қилиб, икковларини келиштириб қўйса ва сотувчи молини ўзи сотса, ҳақ урфга қараб бўлади. («Жомиул фусувлайн»).
Сотувчи ҳам, олувчи ҳам сотаётган ва олаётган нарсасининг нархини билиши керак бўлади. Шунда даллол сотувчи ва олувчи билан ҳам «Келиштириб қўйсам, қанча оламан?» деб келишиб олган бўлса, иккаласидан ҳам келишилган хизмат ҳаққини олса бўлади.