Каъба ичида фарз намоз ҳам, нафл намоз ҳам жоиздир. Бунга Имоми Шофиий хилоф қилиб ҳар икки намозни ҳам Каъба ичида ўқиб бўлмайди дейдилар.
Имом Молик (р.а) эса Каъба ичида фарз намоз ўқилмайди, нафл ўқилади дейдилар. Чунки

Расулуллоҳ (с.а.в.) Фатҳ кунида Каъба ичида нафл намозни ўқидилар дейди.
Расулуллоҳ (с.а.в.) даврида Каъбанинг ичида олтита устун бўлган. Ҳозирда эса Каъбанинг қоқ ўртасида учта устун ўрнатилган. Устунлар мезоб-тарнов томон билан Ҳажарул Асвад ва Рукни яманий орасидаги девор тарафга қаратиб ўрнатилган. Уч устуннинг тепасида тўсин бор. Устунлардан иккитасининг орасига ёғоч сандиқ ҳам қўйилган. Каъбаи муаззамани тозалайдиган, хушбуй қиладиган нарсалар қуйилган. Каъба муаззаманинг остонаси ташқаридан кўриниб тургандек, одам бўйидан баланд. Ичкарига фақат эшикдан ёруғлик тушади. Каъбанинг таги мармар билан қопланган. Ён деворларининг одам бўйидан баландроғигача ҳам мармар билан қопланган. Деворларининг қолган қисми ва шифт «ла илаҳа иллаллоҳ» деб ёзилган яшил рангдаги қимош мато билан қопланган. Ҳожарул Асваддан тавоф қилиб юриб кетганда келадиган биринчи бурчакнинг девори ичкарига бир метрча туртиб чиққан. Ичкарига кирган одам ўзини бошқа оламга кириб қолгандек хис қилади. Ҳамма тарафга хушбўй атирлар суртилган.
Расулуллоҳ Каъба ичида намоз ўқиганлар. Агар имом Каъба ичида туриб жамоатга намоз ўқиб берса, орқасидаги кишиларнинг баьзилари орқасини имомга ўгириб турса ҳам жоиздир. Улардан қайси бири орқасини имомнинг юзига ўгирса, намози жоиз бўлмайди. Кимдир Каъба устида намоз ўқиса жоиздир лекин, Расулуллоҳ (с.а.в) қайтарганлари учун макруҳ. Имоми Шофиий (р.а) Каъба устида намоз умуман жоиз эмас дейдилар.